दीपावली लक्ष्मीपूजन कुबेर पूजन २०२४ निमित्त श्री विठ्ठलास व रूक्मिणी मातेस अलंकार परिधान

दीपावली लक्ष्मीपूजन कुबेर पूजन २०२४ निमित्त श्री विठ्ठलास व रूक्मिणी मातेस अलंकार परिधान

लक्ष्मीपूजनाच्या दिवशी विठ्ठल रूक्मिणीला पारंपरिक साज

पंढरपूर / ज्ञानप्रवाह न्यूज,ता.01- वसुबारस पासून दीपावली महोत्सवास सुरवात झाली आहे. आज लक्ष्मीपूजन कुबेर निमित्त दुपारी पोशाखावेळी दरवर्षी प्रथा परंपरेप्रमाणे श्री विठ्ठल व माता रुक्मिणीला अलंकार परिधान करण्यात आल्याची माहिती मंदिर समितीचे व्यवस्थापक मनोज श्रोत्री यांनी दिली.

 श्री विठ्ठलास सोन्याचा मुकुट,नाम,कौस्तुभ मणी, दंडपेठ्या जोड,हिऱ्यांचा कंगन जोड,मोत्याची कंठी एक पदरी, मोत्यांचा तुरा,शिरपेच मोठा दोन लोलक, शिरपेच मोठा दहा लोक,मत्स्य जोड,तोडे जोड, जवेची माळ दोन पदरी,एकदाणी,तांदळ्या हार सात पदरी,हायकोल,सूर्यकळ्यांचा हार इत्यादी.

श्री रुक्मिणी मातेस सोन्याचा मुकुट,जडावाचा हार, नवरत्नाचा हार, खड्यांची वेणी, पाचूची गरसोळी, चिंचपेटी पांढरी, हातसर जोड, पानाड्याचा  हार, मद्रासी कंठा, जडावाचे ताणवड जोड, चंद्र, सूर्य, बाजीराव गरसोळी, खड्यांच्या पाटल्या जोड, मोत्याचे मंगळसूत्र, सोन्याचे बाजूबंद जोड, मत्स्य जोड, रूळ जोड, पैंजण जोड, नथ, कर्णफुले जोड, ठुशी नवीन, सोन्याचा करंडा, तोडे जोड, छत्रछामर इत्यादि  तसेच  श्री.राधिका मातेस चांदीचा मुकुट, जवमणी पदक, चिंचपेटी तांबडी,हायकोल,लक्ष्मीहार
 श्री.सत्यभामा मातेस चांदीचा मुकुट, ठुशी नवीन, जवेची माळ, पुतळ्यांची माळ, मोहरांची माळ अलंकार परिधान करण्यात आलेले आहेत.

लक्ष्मीपूजनाच्या निमित्ताने परंपरेप्रमाणे विठ्ठल आणि रुक्मिणी मातेच्या खजिन्यातील सुवर्णालंकाराची लक्ष्मीपूजन म्हणून व्यवस्थापक मनोज श्रोत्री यांच्या हस्ते विधिवत पूजा करण्यात आली. तर विठ्ठल आणि रुक्मिणी मातेची दिवाळी निमित्त सुवर्ण अलंकाराची पूजा बांधण्यात आली.  मंदिर व नामदेव पायरी इत्यादि ठिकाणी दिवाळीच्या लक्ष्मीपूजना निमित्त विठ्ठल दर्शनासाठी मोठ्या संख्येने भाविक येत असतात. या पार्श्वभूमीवर मंदिराची केलेली आकर्षक सजावट मनमोहक दिसून येत असून, या सजावटीमुळे संपूर्ण मंदिराचं रुपडं पालटून गेलं तसेच दिवाळीच्या आनंद पर्वानिमित्त मोठ्या संख्येने विठ्ठल भक्तांनी दर्शनासाठी मंदिरात हजेरी लावत असल्याचे कार्यकारी अधिकारी राजेंद्र शेळके यांनी सांगितले.